Mihagad og suyop sa polis gidakop

CEBU, Philippines - Gidiretso og signit sa kapolisan ang usa ka 18-anyos nga lalaking giingong nangagda sa duha ka polis aron manuyop diha sa barangay Pilipog lungsod sa Cordova sa milabay’ng hapon.

Ang gisikop mao si Jaypee Rusane, 18, residente sa maong dapit.

Matud pa ni PO2 Charlie Valmoria sakop sa Intelligence Section sa Cordova Police nga kauban sila ni PO1 Ryan Casipan sa usa ka alarma sa maong dapit dihang kalit giduol ni Rusane ug mihagad kini nga magsuyop sa illegal nga drugas.

Gumikan niini gisakyan sa duha ka pulis ang suspetsado dala ang paghagit nga ipakita ang dala niining shabu nga wala usab langaya sa suspek pagpakita.

Dihang iyang giladlaw ang usa ka paketeng shabu giposasan siya dayon sa duha. (BANATNEWS)