CEBU, Philippines - Modangop na ngadto sa siyudad sa Mandaue ang barangay kapitan sa Labogon sa maong dakbayan nunot sa wala pag-uyon sa usa ka pamilyang nanag-iya sa luna nga gihimong agianan sa kapin 50 ka pamilya sa sitio Tuburan.
Kini human ang maong pamilya nagplanong mopadayon sa pagpakural niini hinungdan nga masirad-an ang agianan sa mga residente ug giingong nagbutang kanila sa peligro sa baha ug lunop.
Si Kapitan Damaso Tumulak nga nahinabi sa Banat News miingon nga nawad-an na siya og paglaum nga makab-ot ang malinawon nga sabot-sabot sa tag-iya sa luna nga nagpakoral ug sa mga lumolupyo. Matud pa ni Tumulak nga wala mosugot ang nanag-iya sa luna sa hangyo sa mga molupyo nga 8-metros nga mahimong dalan sa mga residente.
Nunot niini mipalabang sila og resolusyon sa barangay nga mag-awhag sa lokal nga kagamhanan sa dakbayan aron matabangan sila pagsulbad sa problema.
Matud pa ni Tumulak nga dugay nang gihimong agianan sa maong mga residente ang maong dalan apan niadto lang miaging adlaw nakalitan sila nga gisugdan na kini pagpakoral sa tag-iya.
Nahibulong usab sila nga nakakuha ang maong pamilya og fencing permit gikan sa Office of the Building Officials (OBO) ug gwardiyado og polis ang nangural nga nakapasagmuyo kanila.
Gibasol ni Tumulak ang OBO nganong miisyu sila og fencing permit nga wala gani motan-aw sa lugar.
Hinuon si Atty. Jovanni Tienero nga maoy city legal officer sa Mandaue dihang nahinabi sa mga tigbalita miingon nga gi-refer na sa iyang buhatan ang maong suliran ug ang iyang sugyot mao nga ang mga lumolupyo mangayo og road right of way gikan sa tag-iya sa luna.
Giklaro niya nga pribado man ang maong luna nga gipakoral hinungdan nga posibleng solusyon niini nga pabayran sa tag-iya ang luna nga himuong dalan.(EIM) (BANATNEWS)