Hepe sa Dumanjug police gisuspenso

CEBU, Philippines - Gawas sa nagpadayung imbestigasyon batok ni Sr. Insp. Rully Lauron, hepe sa Dumanjug Police Station nunot sa hostage taking sa iyang presinto niadtong milabay’ng semana, gisuspenso usab kini og usa ka buwan sugod kagahapong adlawa tungod sa kasong simple misconduct of duty.

Kauban ni Lauron pagkasuspenso ang kanhi sakop nga si PO2 Rhexter Armenion nga warrant server sa San Remigio Police Station dihang si Lauron mao pay hepe niadtong 2009.

Ang suspension order giisyu sa Camp Crame niadtong August 17 pursuant sa special order number 2822 tungod sa kasong administratibang gipasaka sa gidakop nila nga si Donnie Demicilio. Si Demicilio adunay warrant of arrest sa kasong attempted homicide apan na-dismiss na diay kini sa Regional Trial Court (RTC) sa dakbayan sa Bogo.

Sa pakighinabi sa The Freeman nga igsuong pamantalaan sa Banat News kang Lauron, kini miingon nga pagkasunod adlaw na siyang nahibawo nga gibasura na sa korte ang maong kaso.

Apan wala matala sa ilang kanhi warrant server nga si PO3 Dindo Mandal ang maong dismissal order.

“Disorganized man gud pag-assumed nako og post, daghang pending nga warrant ang wala ma-serve,” matud pang Lauron. (BANATNEWS)