Miangkong 'killer' sa piskal

CEBU, Philippines - Giangkon sa suspetsado sa pagpatay ni City Prosecutor Patrick Ian Osorio nga ang iyang kauban maoy nakigkita sa usa ka babaye duha ka adlaw sa wala pa nila banhigi ang biktima niadtong tuig 2009 diha sa barangay Mambaling siyudad sa Sugbu.

Si Lyndon Horandoy mitug-an sa mga tigbalita kagahapon nga iyang nakit-an si Allan Sinugat (laing suspek) nga nakigkita sa usa ka babaye diha sa Plaza Indepedencia nga dunay seryosong giestoryahan duha ka adlaw sa wala pa pusila si piskal Osorio.

Si Horandoy nadakpan niadtong Martes sa gabii sa joint operation sa Criminal Investigation and Detection Group (CIDG-7) ug City Intelligence Branch (CIB).

Wala hinuon kini mohatag pa og dugang katin-awan kung ang maong babaye apil ba sa plano sa pagpatay kang piskal Osorio.

Sa sayo pa, migawas ang report nga may babayeng nalambigit sa ambush apan wala pa mahibaw-i kun unsay papel niini sa maong krimen.

Si Chief Inspector Romeo Santander, hepe sa City Intelligence Branch (CIB) kinsa maoy nangulo sa pagkasikop kang Horandoy nagdumili pa usab paghatag og dugang impormasyon kabahin sa kaso.

Kagahapong adlawa si Horandoy mipirma sa pinanumpaang pamahayag atubangan sa mga sakop sa media sa iyang pag-angkon isip gunman ni Osorio.

Matud pa niya nga igo ra siyang gisugo ni Sinugat nga pusilon ang drayber sa silver o puti nga Toyota Revo ug ila kining gisundan diha sa barangay Mambaling ning dakbayan niadtong Enero 6, 2009.

Silang duha luwan niadtong tungura og motorsiklo nga mao say iyahang gigamit pagpamasahero og habal-habal.

Sumala pa sa pamahayag ni Horandoy wala siya makaila sa tawong gipapusil kaniya tungod kay niana nang pagkabuntag niya mahibaw-ing si piskal Osorio diay kini.

Si Horandoy nagkanayon nga sayo pa nianang adlawa gi-kontrata siya ni Sinugat didto sa Tabunok nga mosakay kini kaniya pagkahapon ug gitunolan siya og P200 nga pang-gasolina.

Nianang pagkahapon diha sa South Road Properties (SRP) angkas si Sinugat ug kini mimando kaniya nga duna silay target nga pusilon sa kantidad nga P50 mil.

Nidiretso sila sa bakery diha sa may Ma. Gochan Street, barangay Mambaling ug sa dihang naabot na sila sa maong lugar milakaw pipila ka metros si Sinugat ug dunay gikaestorya sa cellphone.

Matud pa niya nga si Sinugat mao dayoy mimaneho sa motorsiklo ug ilang gisundan ang silver o puti nga Toyota Revo ug dihang nakaduol sila gitunol kaniya ni Sinugat ang usa ka kalibre 45 pistola ug gisugo siya niini pagpusil sa drayber sa maong sakyanan.

Iyang gipusil makaupat ka higayon ang bintana sa driver’s side lakip na ang windshield niini ug pagkahuman midiretso sila sa Tabunok, dakbayan sa Talisay ug mipadayon na siya sa pagpamasahero sa habal-habal. Sukad niadto nagbalhin-balhin na siya og puyo sa Barili, mga barangay sa dakbayan sa Sugbu hangtud nga siya nadakpan sa barangay Guba niadtong Martes sa gabii.

Mihangyo usab si Horandoy nga kung siya prisuhon sa Cebu City Jail dili siya isagol kang Sinugat tungod sa kabalaka niya sa iyang kinabuhi.(Ug Yvonne Sanico, PIT EIM))