CEBU, Philippines - Human sa pipila ka adlaw nga pagpakahilom , mitingog na gyud ang kampo sa nagplanong magtukod og 15 ka andana nga Belle Tower sa Sanson Road , sa Barangay Lahug, batok sa misupak nga mga molupyo sa maong lugar kinsa nahadlok nga makasamok kini sa ilang palibot.
Gani gumikan sa maong reklamo gisanta ni Mayor Michael Rama ang pagluwat og building permit sa maong condominium hangtod nga katun-an sa Office of the Building Official (OBO) ang tukmang lakang nga himoon niini. Apan ang legal counsel sa Belle Tower nga si manlalaban Donato Gonzales miingon nga aduna sila’y mga clearance gikan sa nagkadaiyang ahensiya sa gobyerno nga nagtugot sa pagpatukod nila sa maong proyekto.
Nagkanayon si Gonzales nga aduna sila’y mga maayong plano sa ilang proyekto ug dili tinuod ang pasangil sa mga residente ug sa mga opisyales sa barangay Lahug nga matud pa makahatag kini og kasaba sa palibot ug madugang sa problema sa trapiko sa maong dapit.
Dugang pa niya nga mokabat na sa P12 milyones ang ilang nagasto sa pagkuha lang sa nagkadaiyang clearance aron matukod ang maong proyekto nga sugdan na unta sa miaging bulan apan wala madayon gumikan sa reklamo nga ilang nadawat. - BANAT NEWS