Buko-buko nalungag sa balang holen

CEBU, Philippines - Nalungag sa buko-buko ang usa ka 14-anyos nga bayong-bayong human kini pusila sa wala hiilhing kriminal pinaagi sa pusil-pusil nga gibalahan og holen didto sa barangay Tambangan, lungsod sa San Remegio sa miaging Lunes sa kaadlawon.

Ang biktima mao si Jimboy Bohol Mancing, second year high school sa Dapdap National High School ug taga barangay Tuong sa maong lungsod.

Si PO3 Felipe Ganzael, duty desk officer sa San Remegio Police Station mibutyag sa Banat News kagahapon nga ang biktima nag-angkas sa motorsiklo nga gimaneho sa iyang bayaw nga si Samuel Cañares Tampus paingon sa barangay Tambangan gikan sa Tuong.

Dihang pag-abot nila sa Tambangan gipusil kini sa usa ka lalaki nga nagbitbit og pusil-pusil ug nasabak ang buko-buko sa biktima.

Gihatud dayon ngadto sa Verallo District Hospital ang biktima samtang gipangita sa kapolisan ang kriminal.

Matud pa ni Ganzael nga ang pusil-pusil nga balahan og holen maoy gigamit sa mga mag-uuma sa ilang lungsod sa pagpamusil og langgam apan wala pa silay naimbargo niini. (BANAT NEWS)