CEBU, Philippines - Isip Sugbuanon angayan nga suportahan si Cebu Gob.Gwendolyn Garcia kung modagan kini sa Senado sa sunod bugnong lugaynon sumala pa ni Mayor Paz Radaza.
Kini maoy giluwatang pamahayag ni Radaza atol sa press conference sa mga sakop sa Association of Reporters in Mandaue And Lapulapu In Truth and Excellence (ARMALITE) sa iyang buhatan.
Matud pa ni Radaza nangindahay og lingkoranan sa Senado ang mga Sugbuanon tungod kay dako kaayo kining garbo nga adunay representante sa Senado.
Apan sa dihang gipangutana si Radaza kung iyaha kining ikampanya sa mga Oponganons igo lamang kini mikatawa ug wala motubag sa maong pangutana.
Si Garcia giduso sa pamilyang Marcos uban nila ni Cong. Imelda Marcos, Gov. Imee ug Sen. Bongbong Marcos atol sa ilang pagbisita dinhi sa Sugbu sa milabay’ng bulan ug gituboy nga modagan pagka senador sa umaabot nga piniliay sa 2013.
Ang wala pagkomento ni Radaza sa pangutana sa media posibleng kini tungod kay aduna pay nagpadayong kaso ang dakbayan batok sa Mactan Cebu International Airport Authority diin si Garcia usa sa mga sakop. Ang kagamhanang lokal sa dakbayan sa Lapulapu sukad pa sa panahon ni kanhi mayor ug karon Kongresista Arturo “Boy” Radaza naningil og buhis nga mokabat na sa 1.4 bilyones ka pesos.
Lakip usab sa gipangayo sa kagamhanang lokal sa Lapulapu mao ang pagbutang og representante sa MCIAA Board nga usa ka Oponganon tungod sa pagtuong law-ay kaayo nga anaa sa dakbayan sa Lapulapu ang tugpahanan apan walay representasyon ang mga Oponganons sa maong board gumikan sa politika sa kanhing mga administrasyon.
Apan sa milabay’ng election sa 2010 ang magtiayong Radaza ug si Garcia nagkahiusa sa ilang pagsuporta ni Gilbert “Gibo” Teodoro nga mikandidato pagka presidente sa nasud gumikan usab sa ilang mga utang kabubut-on ngadto ni kanhi Presidente Gloria Macapagal Arroyo. - (BANAT NEWS)