CEBU, Philippines - Naangol ang usa ka tuig nga batang babaye pipila ka minutos human kini mabunyagi dihang natagakan og sanga sa kahoy nga nasiak samtang paingon na untang mamauli gikan sa simbahan sa sitio Ylaya barangay Putat sa lungsod sa Tuburan niadtong milabay’ng Sabado sa alas 12:00 sa udto.
Ang batang babaye nga nalandig karun sa Vicente Sotto Memorial Medical Center (VSMMC) mao si Carmel Moneva nagpuyo sa maong lugar.
Ang amahan sa bata nga si Oscar Moneva, 21, mibutyag dihang na-interview sa Banat News nga nagpabunyag sila sa bata niadtong higayuna nga atol usab sa kapistahan sa ilang lugar.
Apan pagkahuman sa bunyag dihang naglakaw sila paingon nang mamauli sa barangay road samtang gikugos sa maninay ang bata (biktima) mihaguros ang kusog nga hangin.
Matud pa nga tungod sa kakusog sa hangin nasiak ang sanga sa dakung kahoy nga Acasia samtang diha sila sa tungod ug natagak kini napusdakan ang ulo sa bata sa naputol nga sanga.
Tungod sa kakusog sa impact nabuhian sa nagkugos ang bata ug naligid kini sa karsada ug nakuyapan apan daling gipunit sa amahan ug gidala dayun sa Tuburan District Hospital .
Ang mga doktor mimando dayun nga ibalhin ang bata sa Vicente Sotto human hinay-hinay kining nakamatngon apan gi-admit gihapon sa tambalanan sukad kagahapon tungod sa kadaut nga naangkon sa ulo niini.
Gani gitug-an sa amahan nga ang findings sa doktor nabun-og gyud ang utok sa bata hinungdan nga nagpabilin karun sa medikasyon sa tambalanan. (EIM) - (BANAT NEWS)