Miting sa mga defense minister anhi sa Sugbo

CEBU, Philippines - Ang lalawigan sa Sugbo maoy gipili sa kadagkuan sa nasud sa Pilipinas pinaagi sa Department of National Defense nga maoy tukmang dapit nga pahigayonan   sa labing unang Association of Southeast Asian Nations (ASEAN) Defense Ministers Meeting karong   umaabot nga Disyembre.

Kini ang gitug-an ni Professor Raymund Jose Quilop, ang Assistant Secretary for Strategic Assessment sa Department of National Defense (DND) atol sa iyang pagbisita sa buhatan ni Governor Gwendolyn Garcia uban nila si DND Assistant Secretary for Plan and Programs Danilo Francia ug ang representative sa AFP Central Command.

Gipasabot ni Quilop nga ilang gipili ang Sugbo isip venue sa ASEAN Defense Ministers Meeting tungod sa kamadanihon niini sa natad sa turismo   ug gani nagpabilin kining numero uno nga tourist destination dinhi sa Pilipinas.

Apan kining tanan maoy nagpadayag sa maayong matang nga pagdumala ni Gobernador Garcia kinsa naila na isip maayong host sa dagkong mga national ug international event, dugang pa ni Quilop.

Kahinumdoman nga ubay -ubay nang mga dagkong kalihukan ang malamposong gipahigayon dinhi sa Sugbo sama sa Association of Southeast Asian Nations Ministerial Conference niadtong 2007 ug uban pa.

Matud pa ni Quilop nga gikalipay pag-ayo nila ang walay duhaduha nga pagsuporta ni Gobernador Garcia sa labing unang ASEAN Defense Ministers Meeting nga anhi ipahigayon sa lalawigan sa Sugbo sa katapusang bulan sa tuig 2011.   - (BANAT NEWS)