Pagsira sa Tabunok tensyonado

CEBU, Philippines - Hilom man ug walay nahitabong aktwal nga kagubot tali sa mga tinugyanan sa Talisay City Hall ug mga supak nga mga vendors sa Tabunok Public Market apan adunay nakuhang mga Molotov bombs ug nakadakop og armadong lalaki ang kapolisan diha sa maong merkado kagahapon. 

Matud pa ni PO2 Roy Sarsaba sa Talisay Police nakakuha sila og tulo ka Molotov bombs ug pagkasikop kang Archie Villaflor, 18, usa ka sakop sa Alpha Kappa Rho.

Si Villaflor nakuhaan sa kapolisan og usa ka kalibre .38 rebolber nga iyang gitak-in sa iyang hawak. Ang tulo ka Molotov bombs nakit-an sulod sa maong merkado nga gidudahang plano gyung gamiton unta batok sa magkoral sa merkado. Niadto palang Lunes sa gabii nag-human barricade na ang gatosang mga vendors ug mibahad nga ilaha gyung babagan bisan magkinaunsa ang mga mokural sa maong merkado.

Apan nianang pagkakaadlawon nangabot ang mga sakop sa Crowd Dispersal Unit sa Regional Mobile Group ug wala na silay nahimo dihang sila giabog ug gigwardiyahan ang palibot sa merkado samtang gitaod ang mga kural.

Samtang si Paul Labalan, sakop sa Tabunok Public Market Vendors Association, mibutyag nga aduna pay 500 ka mga vendors ang nagpabilin sa Tabunok Public Market.

Matud pa ni Labalan nga dili gyud sila mopahawa ug andam sila nga magpakoral hangtod nga walay taga Talisay government nga moduol kanila aron makig-estorya ug klarohon ang ilang sitwasyon. 

Apan ang kagamhanang lokal sa Talisay mipahibalong ilaha nang putlan og tubig ug kuryente ang maong merkado ug nagtuong pinaagi niini nga dili na molahutay ang mga vendors ug mobalhin nalang gyud sa Gullas-Macapagal Public Market sa Lagtang.

Si Labalan nasagmuyo usab sa pag-abot sa mga polis gikan sa lungsod sa Sibonga ug naglaraw nga mopasaka og reklamo ngadto sa Commission on Human Rights.

Samtang si Albert Obando, Market Administrator sa iyang bahin mibutyag nga sa unang adlaw sa bag-ong merkado naasikaso dayon ang nakit-ang ginagmay nga problema sama sa tubig ug atop.

Ang mga nagmagahing vendors sa Tabunok posibleng dili na gyud makapaninda sa bag-ong merkado tungod kay nahurot na ang stalls gani ang kaniadto street vendors lang sa Tabunok aduna na karoy pwesto sa bag-ong merkado.   - (BANAT NEWS)