Gipatay atubangan sa anak

MANILA, Philippines - Patay ang usa ka lalaki human kini gipusil atubangan sa iyang anak pasado alas-11 sa buntag kagahapon sa dalan Jakosalem sa barangay Kamagayan ning dakbayan.

Ang biktima nailhan nga si Benjie Bauyaban, 37 mamaligyaay og sigarilyo sa maong lugar.

Samtang ang mamumuno giingong nagsakay og motorsiklo nga kolor pula nga Vega Yamaha ug gihulagway nga mga batan-on nga nagpangidaron og dili molapas 30-anyos ug nagsul-ob og bullcap.

Sa inisyal nga imbestigasyon sa kapolisan nasayran gikan sa impormante samtang naglakaw siya uban sa iyang mga higala sa maong lugar kalit lang siya nga nakadungog og buto sa armas.

Dihang iyaha kining gisubay iyang nakit-an ang gunman nga giusban sa pagpusil ang biktima nga nagbuy-od na niadtong tungura.

Matud pa ni SPO1 Victor Ruel Ayuman, sa Cebu City Police Office Homicide Section nga sa wala pa mahitabo ang insidente ang biktima nagkugos pa kini sa iyang anak nga wala pay usa ka buwan.

Sumala pa nga gi-uli kini sa biktima ngadto sa iyang asawa ug milakaw padulong sa basketball court dihang kalit lang nga mipatim-aw ang mamumuno sa likod nga bahin niini ug mipusil sa ulo sa biktima.

Midugang si Ayuman nga atol sa pagpusil diha ang 10-anyos nga anak sa biktima ug nakakita sa nahitabo sa iyang amahan ug gihulagway ni Ayuman nga na-traumatized.

Butyag usab ni Ayuman nga adunay posibilidad nga adunay naka-away ang biktima nga wala lang hisayri sa pamilya tungod kay gihulagway man ang biktima nga usa ka maayong tawo.

Nasayran usab ni Ayuman gikan sa kapitan sa maong barangay nga si Kapitan Celestino Avila nga usa ka ‘mamarokay’ ang biktima apan ila pa usab kini nga susihon.

Gisusi na usab sa Homicide Section investigators kung may criminal record ang biktima tungod sa kadaghan sa mga patik niini sa kalawasan.

Ang kapolisan padayun pa karun nga nag-imbestigar sa tinuoray gayud nga motibo sa pagpamusil. Nakuha sa crime scene ang duha ka kabhang sa kalibre .45 nga maoy gigamit sa pagpusil sa biktima.   (EIM)   - (BANAT NEWS)