Tindahan giunay'g lungkab sa trabahante

CEBU, Philippines - Mokabat sa P40 mil   nga cash ang nakuha sa duha ka mga   katabang sa balay human niini lungkaba og unay    ang tindahan sa ilang amo didto sa barangay Ibabao- Estancia dakbayan sa Mandaue sa milabay’ng adlaw.

Ang biktima mao si Eldebrando Basubas, hingkod, ug residente sa maong dapit ug tag-iya og usa ka merchandising store.

Samtang   ang gitumbok nga nanglungkab mao sila si Joey Manso ug Freddie Dagoy pulos hamtong, ug lumad sa lungsod sa San Remegio.

Matud pa ni Basubas   nga mga alas 9:00 sa milabay’ng buntag    dihang miabli   siya sa ilang tindahan nakugang   siya kay nagpasad na ang mga botelya sa ilimnon sa maong dapit ug nawagtang na sila si Manso ug Dagoy.

Apan labi siyang nakurat   dihang sa pagsusi niya   sa iyang drawer, nawagtang na ang P40 mil nga   halin niya sa tindahan.

Nagduda si Basubas nga ang iyang mga katabang   maoy miunay og lungkab   sa tindahan ug mikawat sa kuwarta sa hunos hinungdan nga gipakuhaan niya og finger print ang nahimutangan sa iyang kwarta sa mga otoridad sa kapolisan. ( WC) - (BANAT NEWS)