Nakapusil mitahan kang Kong. Radaza

CEBU, Philippines - Mitahan kang Kongresista Arturo Radaza ang usa sa iyang mga supporter nakapusail sa   iyang kontra didto sa Purok Camanse, barangay Pajo sa dakbayan sa Lapulapu sa miaging gabii.

Ang mitahan mao si Danilo Balani Sr. 52, minyo, nga nagpuyo sa maong dapit ug ang biktima nga iyang napusilan mao si Manolito Cabalan, 27, ulitawo nga taga barangay Babag II sa maong dakbayan.

Si PO1 Allan Pantaleon sa homicide section sa maong dakbayan miingon nga adunay karaang bangi ang biktima ug ang suspetsado.

Dugang pa niya nga   dihang nakita sa suspek ang biktima nga namisita sa higala niini sa ilang lugar, nagka-estorya pa ang duha   ug didto nahisgotan ang karaan nilang bangi nga misangpot sa ilang panaglalis hinungdan nga milanit ang suspek sa iyang armas ug giluthang ang biktima. Nasabak sa mga bala ang tiyan, bukton ug uban pang bahin sa lawas sa biktima kinsa daling gihatod ngadto sa Lapulapu City Hospital sa sitio Carajay sa barangay Gun-ob sa maong dakbayan.

Apan gibalhin kini   ngadto sa Vicente Sotto Memorial Medical Center sa dakbayan sa Sugbo.

Si PO1 Pataleon miingon nga human sa pagtahan sa suspetsado kang Kogresista Radaza dali usab nga gitugyan   si Balani ngadto sa ilang buhatan ug kasamtangan karong gibalhog sulod sa ilang detention cell.

Gipaabot usab nga mosang-at og kiha ang biktima batok sa suspetsado.   - BANAT NEWS