Driver nalipay sa tukorong flyover

CEBU, Philippines - Gihulagway ni Jimmy Llanos, presidente sa Bantay Taxi Association   nga dako og matampo sa pagsulbad sa problema sa trapiko sa siyudad sa Sugbo ang plano sa Department of Public Works and Highways (DPWH) nga magtukod og duha ka flyover sa habig sa MJ Cuenco ug General Maxilom ug sa corner Gorordo ug Archbishop Reyes Avenue.

Matud pa ni   Llanos nga nagkadaghan na karon ang mga sakyanan ug establisamento busa angayan lang gyud nga butangan og mga flyover ang nahisgutang mga dapit.

Dugang pa niya nga mahimong tulin na unya ang pagbiyahe sa mga public utility vehicle sanglit daghan naman sila og kalutsan ug dili malangan ang ilang mga pagbiyahe.

Gitataw niya nga kung huot ang dagan sa trapiko, maapektohan usab niini ang kita sa mga drayber.

Bisan pa man kun uyon ang transport sector sa maong plano apan si Mayor Michael Rama nagpabilin sa iyang unang opinyon nga mas maayo nga unahon ang road widening kay sa flyover.

Nagkanayon ang mayor nga kinahanglang kompletohon una og panday ang transportation plan ug himoon usab ang nagkadaiyang alternatibong solusyon sa problema sa trapiko una sugdi    ang pagtrabaho sa flyover.

Matud pa ni Rama nga daghan pang mga butang nga angayang   tun-an nga ikaayo sa tanang katawhan ilabi na sa mga motorista.  - BANAT NEWS