Luigi miduso sa House Bill 5201

CEBU, Philippines - Gihatagan na og katumanan ni 6th district Congressman Gabriel Luis "Luigi" Quisumbing ang iyang tinguha nga himoong Consolacion State College ang Consolacion Public College pinaagi sa giduso niyang   House Bill 5201.

Matud pa ni Quisumbing nga ang tuyo sa iyang gipanday nga balaodnon mao   ang paghatag og de kalidad apan maabot   sa mga kabus nga tinun-an nga educational training nga magganoy kanila sa kalamposan   sa   ilang pagtuon sa kolehiyo.

Pipila sa mga   dagkong kurso nga gibuksan alang sa tanang estudyante sa maong eskuylahan mao ang Engineering, Industrial Technologies, Business, Arts and Sciences ug uban pa. Sigun pa ni Quisumbing nga ang mugasto sa dugang programa ug training sa nahisgutang mga kolehiyo mao na ang kagamhanang national.

Pinaagi sa maong kausaban dako kaayo og purohan nga makalampos gayud sa pagtuon ang mga estudyanteng kabus tungod kay moabag naman sa ilang galastohan ang kagamhanan sa nasud.

Sama sa ubang mga state colleges, dili ulahi sa nagkalainlaing natad sa   mga kurso ang mga tinun-an sa maong tulunghaan tungod kay kasagaran sa mga magtutudlo nga idestino niini pulos mga pinili ug hinashasan sa tagsa-tagsa ka natad sa   ilang propesyon. (BANATNEWS)