CEBU, Philippines - Padayong mius-os karon ang kaso sa dengue dinhi sa dakbayan sa Sugbo itandi sa miaging tuig.
Sa labing awahing talaan sa City Health Department, namantala nga mikabat sa 864 ka kaso sa maong sakit ang nalista sukad niadtong Enero hangtod sa Agosto 20 niining tuiga ug walo usab ang namatay.
Ang kasamtangang gidaghanon sa mga nataptan sa dengue mas gamay kun itandi sa mga kaso sa susamang higayon sa miaging tuig nga adunay 1,572 ug 11 ang namatay.
Ang lig-on nga kampanya sa siyudad sa pagbahig sa basura sa malata ug dili malata maoy usa sa mga gitudlo nga rason sa dengue coordinator sa City Health Department nga si Raymond Ogan nga matud pa nakatabang sa pagpamenus sa kaso sa dengue.
Na-edukar na usab kasagaran ang mga tawo sa kanunay nga paglimpiyo sa palibot aron malayo sa nahisgutang sakit.
Ang lima ka barangay nga adunay labing daghang kaso sa dengue naglangkob sa Basak San Nicolas, Punta Princesa, Labangon,Tisa ug Guadalupe.
Usa sa pamaagi nga mawala ang lamok sa palibot mao ang pagyabo sa mga napundong tubig sa mga flower vase, ligid, mga hugasan ug uban pang mga butang nga posibleng mahimong kaitlogan sa lamok nga nagdala sa nahisgutang sakit.
Padayong gipakusgan karon sa siyudad ang ilang kampanya sa mga kabarangayan pinaagi sa pag-house-to-house mismo sa mga barangay health workers sa pagpahimangno sa katawhan kalabot sa maong sakit. (BANATNEWS)