Motorsiklo giimbargo sa mga tulisan

CEBU, Philippines - Usa ka drayber sa habal-habal giimbargohan og motorsiklo sa duha ka wala hiilhi niyang pasahero niadtong Miyerkules sa kaadlawon didto sa barangay   Tanke, dakbayan sa Talisay niadtong Miyerkules sa kaadlawon.

Ang biktima giila sa mga polis nga si Randy “RG” Gonzaga, 26, taga Springwoods Village, lungsod sa Minglanilla.

Base sa imbestigasyon nila ni SPO1 Eric Enad ug PO2 Roy Lofranco nga ang duha ka mga tulisan misakay sa motorsiklo   sa biktima didto sa lungsod sa Minglanilla ug nagpahatod ngadto sa Tanke.

Apan pag-abot na nila sa atubangan sa sam-ang sa Tanke usa sa maong mga pasahero mition og pusil ngadto sa biktima uban sa pagdeklarar nga hold-up apan motorsiklo ray ilang tuyo. Sa kahadlok ni Gonzaga dali nga mikanaog sa iyang motor nga wala mopakita og pagsukol ug gipasagdang ang duha ka tulisan maoy miangkas niini pahilayo sa maong lugar. Nasuta sa mga polis ang nahisgutang motorsiklo giabangan lang ni Gonzaga ug ang tag-iya niini mao si “Neneng” nga taga lungsod sa Minglanilla.

Si Lofranco nga nahinabi sa Banat News kagahapon mibutyag nga sa ilang follow-up operation niadtong Miyerkules sa mga alas 5:00 sa buntag napalgan nila ang kolor blue nga motorsiklo nga nagtangag sa plakang 6127-YB nga gibiyaan sa daplin sa karsada sa Victoria Village, sa barangay Tabunok sa maong dakbayan.

Si Lofranco midugang nga ipatawag nila si Gonzaga ug ipakita ang nahisgutang motorsiklo kung mao ba kini ang gidagit sa mga tulisan gikan kaniya. Apan ang biktima wala makahibawo sa plaka sa motorsiklo nga iyang giabangan. (BANATNEWS)