Kabataan kinahanglang tagdon - Palma

CEBU, Philippines - Si Cebu Archbishop Jose Palma mipadayag sa iyang dakung paghatag og pagtagad alang sa mga kabatan-onan nga iyang nakita nga mao gihapon labing mahinungdanon bahin sa atong katilingban.

Atol sa usa ka press conference kagahapon sa Archbishop Palace si Palma nagkanayon nga bisan pa sa mga isyung moral ug mga pagsulay nga miigo karon sa mga kabatan-onan kinahanglan gihapon nga ipakita ngadto kanila ang pagpangga ug pagmahal aron giyahan sila sa matarung.

“ We should make them aware that we show how important youth are. All it takes is to show our spirit of care and concern for this young people,” matud pa ni Palma .

Ang Catholic Bishop Conference of the Philippines (CBCP) miduyog sa tibuok kalibutan sa pagsaulog sa "Year of the Youth" diin tumong nga maghatag og pagtagad sa mga kabatan-onan sa tibuok kalibutan ug sa ilang papel sa kalinaw ug kalambuan.

Nakita ni Palma nga atol sa bag-o lang natapos nga "World Youth Day" didto sa Espanya, nakita sa tibuok kalibutan ang paghiusa sa mga kabataan nga maoy nakahatag og paglaum sa simbahan bisan pa sa kalisdanan karon.

“The late Pope John Paul II makes us aware how important youth are and we should continue it. They are the future and present of the church,” dugang pa sa arsobispo.

Sa iyang bahin, si Fr. Allen Alevado sa Salesian Youth Movement mibutyag nga pipila ka mga programa sa simbahan ang ilang giandam alang sa mga kabatan-onan.

Lakip niini ang mahitabong Dagan sa Kabataan sa Septiyembre 15, usa ka dakung tigom alang sa National Youth Movement sa Disyembre ug mga tree planting nga bidahan sa kabataan.

Si Commission on Youth Movement chairman Fr. Ronald Guiao namahayag usab nga ipadayun nila ang ilang mga programa sa pagtukod og mga vocational schools alang sa mga batan-ong napriso sa nagkadaiyang salaod. (BANATNEWS)