Patay ilawom sa atabay

CEBU, Philippines - Giimbestigahan karon sa kapolisan ang kamatayon sa usa ka lalaking may gituohang samad dinunggaban sa tiyan nga napalgang naglutaw sa usa ka atabay pasado alas-9 kagahapon sa buntag sa sitio Tawagan 1 barangay Sirao ning dakbayan.

Ang napalgang patay na mao si William Ensores, 52, molupyo sa maong lugar kinsa pag-uma ang panginabuhian.

Sa imbestigasyon sa kapolisan nasayran nga ang ig-agaw ni Ensores nga si Nicolas Cubcuban maoy nakakita kaniya diha sa ilawom samtang kini nagsubay-subay sa ilang flower farm diin mahimutang ang maong atabay.

Sumala pa sa mga polis nga dihang nakit-an kini ni Cubcuban diha sa ilawom nag-ubo ug nagdupa kini nga naglutaw sa tubig sa ilawom ug nagkadugo na ang tubig.

Ang mga mirespondeng sakop sa Homicide Section pinanguluhan ni SPO4 Alex Dacua mao nay mimando sa pag-ugkat sa patay’ng lawas ni Ensores.

Sa paghiling sa kapolisan sa lawas ni Ensores nasuta nga aduna kini samad sa tiyan nga gidudahang inagian sa dinunggaban, wala hinuoy nakit-ang hinagiban diha sa crime scene.

Sa pakighinabi sa Banat News kang Dacua kini mibutyag nga duha ka anggulo ang ilang gitan-aw sa kamatayon ni Ensores.

Una mao ang posibilidad nga kini naghikog ug ang ikaduha mao nga kini aksidenteng nahagbong sa atabay ug namatay samtang wala pa mapahigayon ang awtopsiya sa patay’ng lawas.

Ilaha usab susihon ang posibilidad nga kini gidunggab og laing tawo tungod sa nakitang samad dinunggaban sa tiyan human unya sa awtopsiya sa patay’ng lawas.

Ang igsuon sa biktima nga si Elisa Salvaña dako ang pagtuo nga gipatay gyud ang iyang igsuon. Wala pa hinuoy nakuhang impormasyon ang kapolisan nga magsuporta sa maong pagduda sanglit nagpadayon pa ang ilang imbestigasyon. (EIM) (BANATNEWS)