CEBU, Philippines - Nautingkay ang mga tawong nangagi sa N. Bacalso Bridge kagahapon sa buntag human usa ka lalaki ang kalit nga miambak sa ubos ug nabalian sa iyang batiis sa walay igong hinungdan.
Ang miambak nailhan nga miambak si Douglas Barbarona, nga taga Bohol ug gidudahang adunay sakit sa pangisip.
Sa report sa TV Patrol Central Visayas, si Barbarona mibutyag nga miambak nalang siya tungod kay adunay migukod kaniya nga buot mopatay kaniya kay kuno nabuang na siya.
Sa pakighinabi sa Banat News ni FO1 Alex Acuña, Special Responding Unit sa Bureau of Fire Protection nga miluwas kaniya gikan sa sapa, si Barbarona mitug-an nga may naggukod kaniya kay gipasanginlan siya nga kawatan.
Tungod sa iyang kahadlok nakadesider nalang siya nga moambak sa maong taytayan.
Dugang pasangil ni Barbarona nga nakaila siya sa migukod kaniya kay nianang nakalabay’ng gabii gipainom siya niini og ilimnong makahubog nga adunay gibutang nga ilegal nga drugas. Si Barbarona nabalian sa iyang tuong tiil dihang gitabang sa mga rescuers. (BANATNEWS)