'Karnaper' nadakpan

CEBU, Philippines - Nagtingkagol sa karsel kagahapong adlawa ang usa ka tulisan gipasanginlang misuway sa pagkarnap sa usa ka sakyanan sa dalan Don J Avila barangay Capitol Site.

Ang biktima nga si Mary (dili buot magpaila) nagpangidaron og 33-anyos, taga barangay Lahug mipasangil kang Christopher Tan, 34, taga barangay Guadalupe nga mikarnap sa iyang sakyanan.

Sa pakighinabi sa Banat News ni Mary nga gikan siya naghatod sa iyang anak sa tunghaan sa dihang misulod na siya sa iyang sakyanan misulod usab dayun ang suspetsado.

Tungod sa kakurat niya wala siya makatingog ug ang suspetsado mition kaniya og gunting kay buot niining kuhaon ang sakyanan apan migawas ang biktima dala ang yawe ug nagpakitabang.

Ang mga estambay pagkadungog sa pagpangayo’g tabang sa ginang daling miresponde ug gigukod ang suspek kinsa migawas sa sakyanan ug midagan apan naabtan kini sa mga mirespondeng sakop sa Mobile Patrol Group.

Ang mga polis sa Fuente Police Station mibutyag nga sa ilang pagrekisa sa suspek nakuhaan kini og duha ka gituohang pakete sa shabu, usa ka stick nga gituohang marijuana ug gunting.

Ang deputy chief for operations sa Fuente nga si Insp. Isagani Pugoy mibutyag nga nasikop na kaniadto ang suspetsado tungod sa drugas ug pagpangarnap.

Gisusi na usab sa kapolisan ang kalambigitan sa duha sa pagpangawat sa mga hotel guest sa mga hotel nga giingong usa sa ilang mga modus operandi kakunsabo ang usa ka babaye. (BANATNEWS)