CEBU, Philippines - Napakyas ang planong pagpangawat sa duha ka tulisan nga motulis unta sa usa ka kagawad sa barangay dihang sila nadakpan sa akto sa mga polis nga naghupohupo sa kalibunan sa barangay San Isidro, Asturias niadtong Miyerkules sa hapon.
Ang Asturias Police nga gipanguluhan ni Inspector Danilo Santillan ang nakadakop nila ni Gilbert Gutierrez, 29, taga barangay Dumlog, siyudad sa Talisay ug Vicente Romano Romero, 26, lumad nga taga Basak lungsod sa Guihulngan sa Negros Oriental ug kasamtangang nagpuyo sa barangay Tabunok, siyudad sa Talisay.
Ang mga suspek naaktuhang naghupohupo sa kalibunan daplin sa dalan sa barangay San Isidro, Asturias dihang sila nadakpan sa mga polis human ang kapitan sa barangay San Isidro nga si Rene Yaras mipahibalo kabahin sa plano sa duha.
Nasakmit sa kapolisan ang paltik nga Smith and Wesson .38 revolver kang Gutierrez nga adunay upat ka buhing bala ug ang paltik .22 magnum nga naay tulo ka bala.
Narekober sad sa duha ang duha ka pakete sa marijuana, usa ka pakete nga shabu, Landbank ATM nga gipanag-iya sa usa ka Josephine Seno ug yawe sa motorsiklo.
Si Santillan miingon nga target sa duha ang P200 mil nga dala ni kagawad Neboy Banate sa barangay Kasagaran alang sa mga scraps gikan sa Tsuneishi Heavy Industries sa Balamban.
Ang duha nagsapaw nang daan og pang-ibabaw nga sapot. Samtang ang drayber sa habalhabal nga si Charum Adolfo nga gikostudiya sa mga polis tungod kay maoy gikontrata sa duha isip drayber mibutyag sa mga polis nga ang duha may gikarnap nga duha ka motorsiklo sa Talisay ug sa Minglanilla. (BANATNEWS)