CEBU, Philippines - Nabara ang trapiko sa habagatang bahin sa lalawigan tungod sa landslide ug pagkatumba sa dakung kahoy nga mi-ali sa highway didto sa barangay Bulasa sa lungsod sa Argao niadtong Huwebes sa alas 8:00 sa gabii.
Si PO2 Bernie Lao sa Argao Police Station mibutyag sa Banat News nga milanat og dul-an duha ka oras ang pagkabara sa mga sakyanan tungod sa kabaga sa yuta ug mga bato nga mitam-ok sa tunga sa karsada .
Apan gawas sa yuta ug bato may natumba pa gyud nga balite nga mitabon usab sa karsada nga maoy makapasamot sa pagkabara sa mga sakyanan.
Ang mga molupyo ug mga opisyal sa barangay maoy nagtinabangay pag-iway sa mga bato ug yuta samtang gigamitan og chainsaw sa mga barangay official ang pagputol sa natumba nga dakung kahoy.
Matud ni PO2 Lao nga hapit na alas 10:00 sa gabii nahuman ang paghawan sa karsada ug hingpit nga nakaagi ang mga sakyanan sa maong lugar.
Way gika-report nga na-angol o nakalas sa maong hitabo gawas lang sa nabara nga trapiko. (BANATNEWS)