Bag-ong merkado sa Liloan gibuksan

CEBU, Philippines - Si Gobernador Gwendolyn Garcia   uban sa mga opisyal sa kagamhanan sa lungsod sa Liloan maoy nanguna sa pagbukas sa bag-ong merkado publiko sa maong lungsod sa miaging adlaw.

Ang gobernador nagpasalamat kang Mayor Duke Frasco ug sa tanang   opisyal   sa maong lungsod tungod   kay gikahatag na nila ngadto sa lungsoranon ang dugay nang gipangandoy nga merkado publiko niini. Gumikan niini mapasigarbuhon kaayo ang gobernador gumikan sa maayong pagkagama nga edipisyo nga gigastohan og P23 milyones kapin.

Samtang si Mayor Frasco miingon nga ang Panphil B. Frasco Public Market natukod pinaagi sa tabang ni kanhi Presidente Joseph Estrada ug sa Priority Assistance Development Fund nila ni Senate President Juan Ponce Enrile ug Senador Jinggoy Estrada nga sa kinatibuk-an miabot og P23 milyones.

Si Frasco mibutyag usab nga dako   og natabang ang gobernador sa Sugbo sa pagpalapad sa sementadong dalan ug pagpaaspalto sa pipila ka dalan paingon sa bag-ong merkado.

Ang bag-ong merkado nahimutang sa duha ka ektarya nga luna sa Barangay Jubay ug mokabat sa kapin P40 milyones ang nagasto sa kagamhanan sa Liloan sa pagpatukod sa maong proyekto. Ang usa ka ektarya niini gidonar sa banay’ng Aboitiz samtang ang laing ektarya gihatag sa pamilyang Frasco.

Ang mayor nagkanayon nga maminusan na unya ang kahuot sa dagan sa trapiko sa karaang merkado sa Barangay Poblacion sanglit ang ubang mga konsumedor adto naman mangompra sa bag-ong merkado. (BANATNEWS)