Korean divers naluwas

CEBU, Philippines - Lima ka mga turistang Koreano uban sa laing unom ka tawo ang naluwas gikan sa nabuslot nilang gisakyang pumpboat sa tunga-tungang bahin sa kadagatan sa Nalusoan ug Hilutongan Island nga sakop sa lungsod sa Cordova alas-12 pasado ang takna kagahapon sa udto.

Sa pakighinabi sa Banat News kang PO2 Maximo Villagonzalo Jr., sakop sa tourist police sa kapolisan sa dakbayan sa Lapulapu nagkanayon nga ang pumpboat nga Abeatoshi gikan sa barangay Maribago paingon sa Nalusoan Island diin mag-scuba dive ang mga pasahero niini.

Kuyog sa mga langyaw ang usa ka diving instructor ug dive master, usa ka tourist guide ug laing duha pa ka tawo nga taga dakbayan sa Lapulapu.

Nagduda usab ang kapolisan nga overloaded ang maong pumpboat tungod sa kasayuran nga ilang nahipos nga lima lamang ka tawo ang kapasidad niini.

Matud pa ni Villagozalo nga base sa impormasyon giingong nakasugat og dagkong balod ang pumpboat ug nabuslot dayon nalunod.

Ang mga crew sa Yakusa pump boat nga nahiagi sa maong dapit maoy dali nga nakaluwas sa mga sakay sa Abeatoshi ug gidala sila sa isla sa Nalusoan.  (BANATNEWS)