Romanian naghikog

CEBU, Philippines - Tungod sa problema sa kwarta ug wala nay kontak sa iyang mga ginikanan didto sa gawas naghikog ang usa ka Romanian pinaagi sa pagbalikos sa bakus sa iyang liog nga gipalusot sa handle sa cabinet sa ilang lawak kagahapon.

Si Alfred Csaba Bokor, 32, dunay kapuyong Filipina ug kasamtangan nagpuyo sa usa sa apartment diha sa Villa San Rafael, Happy Valley sa barangay Calamba napalgan sa iyang kapuyong si Jessiel Ponting, 25, nga wala nay kinabuhi.

Si Bokor ug Ponting dunay anak babaye nga nagpanuigon usa ka tuig ug siyam ka buwan. Si Ponting nga nahinabi sa Banat News nagkanayon naguol iyang kapuyo tungod kay wala na kini income sanglit ang gisaligan niini mao ra ang komisyon sa pagkadistributor og produkto.

Niadtong Lunes gikatahong misulti kaniya si Bokor nga gusto na niini molayat sa ilang balay apan iyaha kining napugngan ug gimaymayan bahin sa ilang anak.

Gihulagway ni Ponting iyang kapuyo nga hilomon ug may kahadlok sa Diyos sanglit himasa kini og Bibliya.

Matud niya nga sa miaging gabii nag-inom silang duha nagbuwag sila og katulog og kwarto apan kagahapon sa buntag nakadungog siya og lagubo sa pikas kwarto apan wala niya panumbalinga.

Nianang pagka alas-9 pasado iyang gisusi si Bokor apan patay na kini ug may bakos sa liog hinungdan nga nangayo siya og tabang.

Si Ponting ug Bokor nagkaila pinaagi sa internet ug niadtong tuig 2009 nagkita sila dinhi sa Sugbu hangtud nga sila nag-ipon ug nakaanak.

Giingong grabe ang kaguol ni Bokor nga wala na siyay kontak sa iyang mga ginikanan sa ilang nasud ug naglisod na kini sa ilang panalapi.

Nasuta usab sa kapulisan nga ang VISA ni Bokor dugay nang ni-expired niadto pang bulan sa Abril tuig 2009. Gikatakdang ipa-awtopsiya ang lawas niini. (BANATNEWS)