Monterrazas mohangyo sa mga silingan

CEBU, Philippines - Ang pagtinabangay sa pribadong sektor ug gobiyerno maoy panawagan sa kampo sa Monterrazas de Cebu kalabot sa nahitabong pagbaha sa pipila ka mga sitio sa barangay Guadalupe.

Sumala pa sa managing director sa maong subdivision nga si Atty. Dindo Perez nga dili angayan magbasulay kung kinsa ang tinubdan sa baha sanglit ang dinaliang solusyon maoy gikinahanglan karong panahona.

Ang Genvi Development nga maoy developer sa Monterrazas mihimo na og nagkadaiyang plano sa pagpalambo sa ilang drainage system ug nanghinaut nga mokooperar ang ubang pribadong residente nga namuyo duol sa site.

Usa sa nakitang problema sa developer nga adunay mga kabalayan duol sa Monterrazas ang wala mosumpay sa ilang kanal nga ilang hinimo ug buot nilang mokooperar ang mga residente pinaagi sa pagsumpay sa ilang kanal.

Gipadayag usab niini lig-on ang 13 nila ka detention ponds ug ilaha pa kining dugangan og duha. Gipadayag ni Perez nga ang nahitabong baha niadtong Hulyo sa Guadalupe resulta kadto sa grabeng pagbunok sa uwan ug dili angayan nga basulon dayon ang Monterrazas.

Gipasalig hinuon sa developer nga mohimo usab sila og mga solusyon aron dili na masubli ang baha.

Samtang si Konsehal Alvin Dizon mapasalamaton sa Genvi Development sa gihatag nga pasalig.

Giawhag ni Dizon nga dunay himuong close monitoring gikan sa dakbayan ug Department of Environment and National Resources sa operasyon sa Genvi Development alang pagsulbad sa problema. (EIM) (BANATNEWS)