Koreana misukol sa tulisan naangol

CEBU, Philippines - Usa ka Koreana ang naangol human kini ug iyang higalang Koreana misukol sa tulisan nga buot mobiktima kanila diha sa sitio Suba Panas, Brgy. Marigondon dakbayan sa Lapulapu sa milabay’ng gabii.

Ang mga biktima mao sila ni Lee Aire, 24 ug Jeyeon Hung, 24, mga dalaga ug mga Korean nationals nga kasamtangang nagpuyo sa Pacific Grand Villas sa barangay Marigondon dakbayan sa Lapulapu.

Matud pa ni Lee atol sa pagtaho niini sa Theft and Robber Section sa kapolisan sa Lapulapu nga mga alas 7:35 sa milabay’ng gabii naglakaw sila sa maong dapit dihang gisundan sa wala mailhing lalaki. Pag-abot sa usa ka ngitngit nga bahin sa maong dapit kalit mideklarar og tulis ang nag-inusarang tawo dungan sa pagpangayo sa bag ni Lee.

Wala mohatag si Lee sa iyang bag ug misukol ang kauban niining si Hung ngadto sa tulisan. Apan wala makabantay si Lee nga mibunot og kutsilyo ang tulisan ug gidunggab kini kaniya apan iyang nasawo

Ang tulisan daling misibat human madunggabi ang biktima ug napakyas pagkuha sa bag sa mga biktima.

Gidali og dala sa tambalanan si Lee tungod sa samad dinunggaban sa iyang kamot ug luwas na kini sa makuyaw nga kahimtang, samtang ang kapolisan sa Lapulapu padayon ang pagpangita ug pag-ila sa responsable sa maong krimen. (EIM)(BANAT)