CEBU, Philippines - Ang barangay North Poblacion, dakbayan sa Naga sa habagatang bahin sa lalawigan sa Sugbo magsaulog sa ika-50 ka tuig nga adlaw sa kasumaran sa pagkatukod karong Septiyembre 4 niining tuiga.
Si North Poblacion Barangay Kapitan Renato Manabat mibutyag sa Banat News nga nagkadaiyang kalihokan ug mga kalingawan ang ilang giandam aron mahimong sadya ug mabulokon atol sa kasaulogan.
Nianang adlawa usab pasidunggan ang nagkadaiyang personahe sa barangay nga nakatabang sa kalamboan niini nga naglakip sa corresponde sa Banat News nga si Quir Laping de Gracia.
Si de Gracia maoy giilang amahan sa pagkahimugso sa barangay North Poblacion niadtong 1961 ubos sa pamunoan ni Mayor Reynaldo Mendiola.
Si De Gracia maoy napili nga labing unang tenyente del barrio kon barangay kapitan ug nahimo usab nga barangay kagawad hangtod sa tuig 2004.
Dugang pa ni Manabat nga atol sa maong kasaulogan inagurahan usab ang bag-ong mini playground ug ang foot bridge samtang adunay himuong Santos nga Misa , feeding program ug parlor ug parlor games, ball games ug uban pa. (BANAT)