Caretaker sa poultry gisikop

CEBU, Philippines - Usa ka piyado sa poultry farm gisikop kagahapon sa mga sakop sa Criminal Investigation and Detection Group (CIDG)-7 tungod sa   giingong pagpangawat niini sa mga manok nga iyang gibantayan.

Si Emerita Bentoy, taga barangay Malapoc sa dakbayan sa Danao wala makaikyas dihang miabot ang kapolisan nga misilbi og warrant of arrest kaniya sulod sa ilang balay .

Ang korte mirekomendar og P24 mil   nga piyansa   alang sa temporaryo niyang kagawasan.

Ang kihante   nga si Maria Veda Montesclaros maoy tag-iya sa poultry farm   nga gitrabahoan sa suspetsado.

Matud pa ni Montesclaros nga iyang gikiha ang suspetsado gumikan sa giingon niyang pagpangawat niini sa iyang mga manok hinungdan nga naalakanse siya og dul-an P1 milyon sa katapusan niyang harvest niadtong Mayo ning tuiga.

Si Montesclaros nga contract grower sa Magnolia San Miguel Foods, miingon nga 600 ka manok ang nawagtang nga tag P100 ang presyo sa matag usa

Tungod sa kadako na sa iyang alakanse , mi-file siya og bankruptcy sa City treasurer’s Office Danao niadtong Hunyo 2 niining tuiga .

Matud ni Montesclaros   nga nakahimo ang suspetsado sa pagpangawat kay kausa ra siya moduaw matag semana sa iyang poultry farm.

Nahimong saksi sa kihante ang duha niya ka trabahante   kinsa maoy mitumbok kang Bentoy   nga matud pa maoy nagpunay og pamaligya   sa mga manok sulod sa poultry.

Hinuon hugot nga gipanghimakak ni Bentoy ang maong pasangil.  - BANAT NEWS