Estudyante gitabanga'g pusil angol

CEBU, Philippines - Usa ka tinun-an sa kolehiyo naangol human kini pusila sa duha ka kriminal nga nagsakay og motorsiklo sa atubangan sa Sto. Rosario Church sa dalan P. Del Rosario Extention, ning siyudad sa Sugbo kagahapon sa kaadlawon.

Ang biktima mao si Joseph Christian Rizon, 18, first year college sa usa ka inilang unibersidad dinhi sa dakbayan nga taga T. Villa St., sa barangay T. Padilla.

Samdan siya   sa luyong bahin sa iyang hawak ug ubos nga bahin sa walang bukton ug anaa karon sa Cebu City Medical Center (CCMC).

Si PO3 Ruth Violango sa Homicide Section sa Cebu City Police Office (CCPO) nga gikahinabi sa Banat News nagkanayon nga ang biktima uban iyang upat ka higala, duha ka babaye ug duha ka lalaki naglakaw sa maong lugar kay ilang pasakyon ang usa ka babaye nga ilang higala.

Apan sa dihang diha na sila sa kilid sa simbahan miabot ang usa ka lalaki nga nagsakay og motorsiklo   ug mipusil sa biktima kinsa naigo sa ubos sa   iyang hawak.

Giusban kini og pusil apan wala na makabuto ang armas sa kriminal kay mikagar.

Apan laing lalaki nga miabot nga nagsakay gihapon og motorsiklo ug mipusil na usab sa biktima ug   nasabak na usab kini sa iyang bukton.

Human sa hitabo ang duha ka suspetsado daling mipasirit sa ilang motorsiklo palayo sa lugar. Nasayran sa kapolisan nga sa wala pa mahitabo nakig-inom ang biktima sa iyang mga barkada sukad   pa niadtong Lunes   sa gabii sa usa ka imnanan duol sa Sto. Rosario .

Matud ni Violango nga posibling gisuyaan ang biktima sa laing grupo sa mga batan-on sa imnanan hinungdan nga gisundan sila sa ilang pagpamauli og gipusil.  - BANAT NEWS