4 anyos gilugos sud sa kasilyas sa barangay

CEBU, Philippines - Usa ka 4-anyos nga batang babaye ang nabiktima sa pagpanglugos diha mismo sa pansayan sa barangay hall sa ilang barangay sa lungsod sa Madridejos niadtong Domingo sa udto.

Usa ka traysikad drayber ang gidakop sa mga tanod nga giilang si Ryan Baliar Rosatase, 20, dihang nasakpan sa ig-agaw’ng babaye sa biktima sa gibuhat niini.

Sigun sa taho sa kapulisan ang mga tanod nga nakadakop kaniya maoy mi-turnover sa suspek uban sa biktima ug ginikanan sa bata.

Sa pasiunang imbestigasyon sa kapulisan ang suspek nadakpan sa duha ka tanod nga sila si Leonilo Castro ug Sandro Santillan human gisumbong sa duha ka bata ang gibuhat sa suspek ngadto sa biktima.

Si PO2 Carlo Mondejar sa Madredijos Police Station nga gikahinabi sa Banat News nagkanayon nga nagduwa ang biktima uban sa iyang maguwang lalaki nga 6-anyos ug ig-agaw nga babaye sulod sa pansayan sa babaye kay nanghugas sa ilang mga kamot.

 Ang suspek giingong kalit nga misulod sa pansayan sa lalaki ug giingong gitawag niini ang biktima ug gihaylo og P1 aron kini moduol ngadto kaniya.

Ang ig-agaw sa biktima nga 5-anyos nakakita nga gihuboan sa sapot ang biktima ug gipahimuslan hinungdan nga daling misumbong sa iyang igsuon kinsa daling mipunit og mga bato ug gibato ang suspek.

Tungod niini daling midagan ang suspek gawas sa pansayan ug gibiyaan ang biktima. Apan kini naabtan ug gidakop.

Matud ni Mondejar positibong nahilabtan ang bata paghiling sa Bantayan District Hospital.  - BANAT NEWS