Pusher nakuhaa'g shabu ug armas

CEBU, Philippines - Nasikop sa hiniusang pagpangronda sa kapulisan ug mga sakop sa Philippine Enforcement Agency kon PDEA-7 ang gipasanginlang notadong tigpayuhot og gidiling drugas nga naglihok sa lungsod sa Asturias niadtong Sabado sa alas 12:15 sa udto.

Ang nasikop mao si Adonay Batulan Rallos, 42, molupyo sa barangay Poblacion, Asturias kinsa nakuhaan og walo ka paketeng gidudahang shabu ug usa ka KG-9 submachine pistol nga dunay tulo ka magazine ug dunay 17 ka mga buhing bala.

Matud ni Insp. Danilo Santillan taud-taod na nilang gipanid-an ang kalihukan ni Rallos nga mag-on and off sa pagpamaligya og shabu sama sa panahong adunay mga selebrasyon.

Niadtong naghinangat pa ang pista sa lungsod niadtong petsa 15 ug 16 gikatahong subling namaligya og shabu ang suspek hinungdan nga dunay nahitabong operasyon lakip na sa mga sakop sa PDEA.

Usa ka buy-bust operation ang gilusad nga miresulta sa iyang pagkasikop ug nadiskubrehan nga sa barangay Lorega sa dakbayan sa Sugbo kini magkomprahan og shabu.

Matud ni Santillan si Rallos maoy ikaduhang tigpayuhot og ginadiling drugas sa ilang lugar nga ilang nasikop karung buwana human madakpi ang laing notadong pusher nga si Robwam Agwanta atol sa buy-bust niadtong petsa 11 sa barangay Poblacion diin nakuhaan kini og 40 ka paketeng shabu. (BANATNEWS)