CEBU, Philippines - Usa ka drug pusher nga dugay nang gibantayan sa kapolisan sa katapusan nadakpan na , ug nasakmitan usab og duha ka paketeng shabu didto sa barangay Nangka, lungsod sa Consolacion kagahapon sa alas 5:00 sa buntag.
Ang nadakpan mao si Jurnel Solit Navarro, 24 , ulitawo nga nagpuyo sa maong dapit samtang ang misikop kaniya mao sila si SPO1 Ronelito Montanez ug mga kauban.
Si PO3 Alin Garciano sa Consolacion Police Station nga nahinabi sa Banat News miingon nga migamit sila og usa ka police decoy nga maoy nagpakaaron ingnong buyer og shabu sa maong higayon.
Dihang gitunol sa suspek ang shabu human madawat ang marked money diha-diha giposasan siya sa kapolisan.
Sa pagkakaron nagtingkagol na ang suspetsado sa bilanggoan ug giandam na usab ang tukmang kaso nga ipasaka batok kaniya nga may labot sa paglapas sa Section 5 ug Section 11 sa Article II ubos sa Republic Act 9165 kon Comprehensive Dangerous Drug Act of 2002. (/WC) (BANATNEWS)