TCPS kuwang og sakyanan

CEBU, Philippines - Apektado ang kapolisan sa dakbayan sa Talisay sa ilang operasyon ilabi na kung adunay mga alarma tungod sa kakuwang sa ilang sakyanan karon.

Nabantayan sa Banat News nga usa na lang ka Terrano patrol car ang masige og badhas nga maoy motubag sa alarma.Ug kung dunay sunod-sunod nga alarma kinahanglan pang maghuwat ang uban nga nagpaalarma.

Si Superintendent Eddie Recamara ang officer-in-charge sa Talisay City Police Station nga nahinabi sa Banat News nagkanayon nga magsige na og kaguba ang ilang mga sakyanan posibleng tungod sa kadugay na niini.

Ang TCPS adunay duha ka Terrano patrol car, usa ka back to back nga multicab, usa ka jeep ug ang labing ulahi ang Innova.

Apan matud sa OIC nga ang Innova atoa sa Toyota tungod kay duna kini problema ug ang ubang mga nahisgutang sakyanan atoa sa motorpool.

Gawas sa Innova ang nahisgutang mga sakyanan human maayo sa motorpool modagan lang kini og pila ka semana maguba na usab.  - BANAT NEWS