Broadcast media way labot sa anti-tabloid ordinance

CEBU, Philippines - Giklaro ni 6th District Board Member Ouano ang mitumaw nga mga taho nga nagtinguha siya sa paglakip sa pag-regulate ang broadcast media sa ipalabang nga “Anti Tabloid Ordinance” nga giduso ni Bise Gobernador Agnes Magpale nga ilang gituki karon sa hunta probinsiyal.

Si Ouano sa iyang pamahayag sa DYKC Radyo Ronda iyang gipasabot nga ang paghisgot sa radyo wala gyud maggikan kaniya atol sa ilang caucaus ug miklarong kinomedya ra kadto.

Gitataw ni Ouano nga ang broadcast media adunay tukmang ahensiya nga gitahasan sa kagamhanan sa pag-monitor ug sa paglatid og mga lagda sa pagpanibya.

Naglakip niini mao ang National Telephone and Communication (NTC) nga ahensiya nga gitahasan sa kagamhanan nga mao usab ang kadangpan kun adunay reklamo kun adunay nakahimo niini og kalapasan.

Gawas pa niana adunay kaugalingong kahugpongan ang broadcast media kinsa maoy naglatid sa ilang mga lagda ug sa pagpanibya sama sa Kapisanan ng mga Broadcaster ng Pilipinas (KBP) nga kun mamatikdan man ugaling nga adunay nalapas mahimo man nga adto isang-at ang reklamo alang sa katin-awan niini.

Matud pa ni Ouano tungod niini alang kaniya wala na kinahanglana pa nga malakip nga kabuhatan og ordinansa ang broadcast media sa ordinansang anti-tabloid ordinance nga human sa ilang pagtuki isunod ang public hearing. Giangkon ni Ouano nga seryoso ang bise gobernador sa gidusong anti tabloid ordinance nga gihulagway ni Magpale nga nagpatik og mga malaw-ay nga basahon ug hulagway. Buot ni Magpale ang pag-ban sa mga tabloids dinhi sa Sugbu.

Hinuon daghan dayon ang misaway niini ug mismong mga kauban niini sa hunta nagdudang daghang nalapas nga katungod ilabi na sa Konstitusyon ang maong ordinansa.

Pipila usab sa mga media personalities ang mihulagway nga usa ka matang kini sa pag-ipit sa kagawasan sa prensa sanglit wala na kinahanglana pa ang maong planong ordinansa ug ang gikinahanglan lang mao ang pag-regulate niini.   - BANAT NEWS