CEBU, Philippines - Nabulit sa samad sa kutsilyo ang lawas sa asawa human kini unaya og dunggab patay sa iyang kaugalingong bana didto sa Enriquez Compound sa barangay Punta Princesa ning dakbayan sa Sugbo kagahapon sa alas 11:00 pasado sa buntag.
Ang biktima nailhan nga si Lalaine Traya, 44, samtang ang suspetsado mao usab si Luciano Traya, nga iyang bana, hingkod nga pulos nagpuyo sa maong dapit. Sa pakighinabi sa Banat News ni PO2 Leroy Baguio, sa homicide section sa Cebu City Police Office, nasayran nga samtang nag-inom ang suspek og ilimnong makahubog sa ilang balay, misulti kini sa iyang anak nga si Luciano Traya III nga may mahitabo sa inahan niini sa maong higayon.”
Human sa maong pagpamulong, namatikdan nalang sa bata nga gigukod na sa suspek ang asawa niini og kutsilyo ug dihang naapsan kini sa balay sa ilang silingang si Lorna didto gitusaktusak an g lawas niini sa iyang hinagiban hangtod nga nabugtoan sa kinabuhi.
Human malup-og sa yuta ang biktima nga naglunang sa iyang dugo, misibat dayon ang suspek pinaagi sa pagsakay og taxi apan ang kapolisan nga nakabantay sa maong hitabo misikop dayon sa kriminal didto sa dalan F. Jaca, sa barangay Pardo. Matud pa ni Baguio nga ang suspetsado daan nang naghambin og kalagot sa iyang asawa tungod kay nasayran niini nga may gikarelasyon kuno kining laing lalaki.
Midugang si Baguio nga ila pang sutaon kun unsa ka tinuod ang giasoy sa suspetsado kanila kinsa anaa nagtingkagol na sa prisohan karon.
Kasong parricide ang isang-at batok sa suspetsado. - BANAT NEWS