1 patay, 2 angol sa pagpamusil

CEBU, Philippines - Patay ang inahan samtang kritikal ang iyang anak ug samdan ang ilang katabang   human sila pamusila sa wala hiilhing    kriminal didto sa sitio Lower Proper, barangay Toong, ning dakbayan sa Sugbo sa miaging Sabado sa hapon.

Ang   nakabsan sa kinabuhi mao si Vivencia Bacalso, 61, samtang ang naangol mao ang anak niini nga si Angeles Tabas, 30,   maoy barangay secretary sa Toong , ug ang ilang katabang nga si Lonie Bentual.

Si Bacalso diha-diha namatay, samtang si Tabas anaa sa talandugong kahimtang karon sulod sa tambalanan uban ni Bentual.

Sa inisyal nga imbestigasyon sa kapolisan nasayran nga samtang ang katabang nga si Bentual nagbantay sa bata sulod sa ilang balay nakadungog kini og buto-buto sa armas sa gawas sa balay diin didto sila si Bacalso ug si Tabas nga anak niini.

Pagkataudtaod may   mituktok sa ilang balay ug sa pagbukas niya sa pultahan maoy nakita ni Bentual    ang inahan ug anak nga nagbuy-od sa yuta nga naglunang na sa ilang kaugalingong dugo.

Tungod sa iyang kahadlok   si Bentual daling mibalik sa sulod sa balay ug mikugos sa bata nga iyang gibantayan apan gipusil gihapon siya sa mamumuno.

Dali siyang miambak sa balay bisan samdan sa paa ug mikaratil og dagan paingon sa sapa duol sa ilang balay aron sa pagsalbar sa iyang kinabuhi ug sa bata.

Sa pakighinabi sa Banat News ni PO2 Cristobal Geronimo sa Cebu City Police Office, Homicide Section mibutyag nga sa wala pa mahitabo ang pagpamusil, ang mga silingan   sa mga biktima mibutyag nga adunay   duha ka tawo nga nangita   kang Bacalso.

Gihulagway nila ang usa niini   nga nagsul-ob og t-shirt nga green nga nag-short lang.

Matud pa ni Geronimo nga ang inahan ug ang anak nakaangkon og samad pinusilan sa nagkadaiyang parti sa iyang lawas samtang ang katabang nakaangkon lang og samad sa iyang tuong paa.

Midugang si Geronimo nga usa sa ilang gisubay karon mao ang trabaho ni Bacalso nga usa ka ahente og yuta aron masuta nila ang motibo sa maong   pagpamusil.

Midugang si Geronimo nga si Bacalso   buotan sumala sa mga silingan niini hinungdan nga wala sila makakita   sa tukmang rason nganong gipatay kini.

Nakuha sa crime scene ang usa ka kabhang sa kalibre .45 nga pistola ug usa ka tingga sa maong bala.

Si Tabas anaa sa Chong Hua Hospital   tambali, samtang si Bentual   anaa usab sa Cebu City Medical Center.

Padayon pang giimbistigar sa kapolisan ang maong  hitabo ug gipangita na ang kriminal.   - BANAT NEWS