CEBU, Philippines - Gipasalamatan ni Governor Gwen Garcia ang mga kalungsoran nga daling merespondi sa nahitabong aksidente sa lungsod sa Barili niadtong Huwebes.
Kini nunot sa pagpadala sa ilang mga tagsa-tagsa ka mga ambulansya ngadto sa maong lungsod nga gikargahan sa mga nangaangol sa pagpanghatod niini ngadto sa tambalanan sa dakbayan sa Sugbo.
Matud pa sa gobernador nga natandog siya sa kaabtik nga gipakita sa mga kalungsoran bisan og layo ang uban sa Barili aron lamang malibre ang kinabuhi niadtong nangaangol sa maong hitabo.
Nakaingon ang gobernadora nga wala siya magmahay sa iyang pagpanghatag og mga mini ambulance ngadto sa kalungsoran kay iyang nakita nga sa higayon nga may dagkong trahedya, ang kalungsoran andam kaayong motabang pinaagi sa pagpadala sa ilang ambulansya. Gani nagtuo ang gobernadora nga ang maong mga mini ambulance maoy dakong hinungdan nga menus ra kaayo ang namatay sa aksidente didto sa Barili kay nadali man sila paghatod ngadto sa hospital.
Dugang pa sa gobernador nga dako usab kaayo ang iyang pagtuo nga ang mga mini ambulance nga iyang gihatag sa mga kalungsoran nakapamenus usab sa mga pasyenteng nangamatay sa ilang tagsatagsa ka dapit dili lamang sa panahon nga may aksidente tungod kay matambalan man dayon sa doktor basta madali pagdala sa tambalanan ang usa ka masakiton. (BANATNEWS)