Driver sa de karga gikiha na
CEBU, Philippines - Pormal nang gipasakaan og kaso sa hukmanan ang drayber sa trak de karga nga nalimbuwad ug namatyan og 10 ka tawo, samtang 50 ang naangol didto sa barangay Balao, niadtong Huwebes sa udto.
Alas 9:00 kagahapon sa buntag gisang-at nila ni PO2 Hector Veloso ug PO2 Ildefonso Cotas ang kaso batok kang Alwin Bayno, usa job order employee sa lungsod.
Si PO2 Gerar Larong sa Barili Police mibutyag sa Banat News nga didto usab ang drayber sa buhatan sa provincial prosecutors office dihang gisang-at ang kaso batok kaniya.
Nasuta sa imbistigasyon sa kapolisan nga ang pagbuto sa rubber cup sa preno sa maong sakyanan maoy nakaingon nga nalimbuwad kini ngadto sa lupot sa maong lugar.
Nasayran usab sa Banat News gikan kang Mayor Teresito Mariñas nga karong hapon dunganon sa paglubong ang 10 ka mga patay didto sa menteryohan sa lungsod.
Kini human sa Santos nga Misa karong ala 1:00 sa hapon sa simbahan sa lungsod.
Matud pa sa mga tagtungod nga gusto nilang malubong dayon ang ilang mga minahal sa kinabuhi aron dili sila sanapan sa kaguol nga magsud-ong niini.
Samtang ang P5 mil nga ihinabang ni Mayor Mariñas sa mga pamilya sa biktima madawat nila karong Lunes.(WC) (BANATNEWS)
- Latest
- Trending
