2 nadunggaban sa karambola

CEBU, Philippines - Duha ka lalaki nadunggaban ug nakulatahan atol sa karambola   didto sa   barangay San Roque, dakbayan sa Talisay sa miaging gabii.

Ang nadunggaban giila sa mga polis nga si Homobono Nguho, samtang ang nabun-og sa kulata mao si Mark Anthony Gino, pulos hingkod, nga mga residente sa nahisgutang lugar. Gitumbok usab sa kapolisan ang miluba ni Nguho ug mikulata kang Gino mao sila si Ritskie Golosino, Gabriel Golosino ug Warry Golosino, pulos hingkod, nga mga silingan ra sa mga biktima.

Si SPO1 Mikie Espina nga nahinabi sa Banat News kagahapon mibutyag nga sa wala pa ang pagpanunggab si Nguho uban sa iyang mga higala nga sila si Dante Jubay, Romel Magbanwa, Mark Joseph Rafanan ug si Gino nag-istoryahanay atubangan sa kapilya sa ilang barangay.

Apan ang grupo sa mga Golosino kinsa giingong mga hubog kalit lang mitungha nga nagbitbit og mga botelya sa beer ug kutsilyo ug gibuak ang usa ka beer sa ilang atubangan.

Busa milakaw ug mibiya sa maong dapit ang grupo ni Nguho apan giingong gisundan kini sa mga Golosino ug kalit  lang gidunggab niini ang buko-buko ni Nguho, samtang si Gino nga buot motabang kang Nguho, gikulata usab sa tulo ka Golosino.

Si Gabriel ug Warry nasikop   dayon sa kapolisan ug nagkagulkol na karon sa prisohan, apan si Ritskie, nakaikyas ug maoy gipangita karon sa kapolisan. (BANATNEWS)