Mass wedding sa 160 ka magtiayon himuon

CEBU, Philippines - Sa pagsaulog sa ika-4th charter day sa dakbayan sa Naga karong Septiyembre 5, 2011 mokabat sa 160 ka parisang magtiayon ang makabenipisyo sa ipahigayong mass wedding sa siyudad.

Ang nahisgutang kalihukan maoy   usa sa dakong bahin sa maong selebrasyon diin si Bise Presidente Jejomar Binay gidapit nga maoy mo-sponsor sa mga kaslonon.

Hinuon si City Administrator Arthur Villamor nagkanayon nga naghuwat pa sila sa tubag gikan sa buhatan ni Binay   kalabot niini.

Gibutyag ni Villamor nga ang maong mass wedding libre   ug walay bayranan ang kaslonon apan   usa sa kompletohon sa matag paris mao   ang certificate of no marriage (CENOMAR).

Ang mga kaslonon kinahanglang motambong sa mga seminar ug iandam ang tanang panginahanglan alang sa kasal. Ang kagamhanan sa siyudad sa Naga maoy moabaga sa reception nga    ipahimutang sa multi-purpose hall duol sa simbahan sa Saint Francis of Asisi sa barangay Poblacion.

Si Villamor miawhag usab sa mga residente sa siyudad nga mopahimos sa ipahigayong medical-dental mission karong Septiyembre 1, 2011 nga usa usab sa highlight sa lima ka adlaw’ng pagsaulog sa anibersaryo sa charter day o sa pagkahimong siyudad sa Naga.

Sa Septiyembre 2, dunay ipahigayong job fair, agro fair sa Septiyembre 3, ug fun run sa Septiyembre 4.

Kahinumduman nga ang Naga giproklamar sa Commission on Election (Comelec) nga usa sa component city niadtong Septiyembre 2, 2007 human sa gipahigayong plebisito diin mayoridad sa taga Naga ang mibotar og “yes” o miuyon nga mahimong siyudad ang kanhi lungsod sa Naga.

Si Kongresista Eduardo Gullas sa unang distrito sa lalawigan sa Sugbo maoy nangamahan sa balaodnon nga mao ang Akta Republika 9491 nga naghimo sa Naga nga siyudad.  (BANATNEWS)