2 polis nadisgrasya sa ginukoray

CEBU, Philippines - Naangol ang duha ka mga polis human malamba ang motorsiklo nga ilang gisakyan samtang nag-responde pagsikop sa usa ka runner sa illegal nga sugal sa masiao sa bukirang bahin sa barangay Langub lungsod sa Argao niadtong Miyerkules sa gabii.

Ang mga naangol mao sila si SPO1 Arnold Abenir ug PO1 Gerald Toquiro pulos nadestino sa Argao Police Station.

Matud ni PO2 Bernie Lao, desk officer sa Argao Police Station dihang nahinabi sa Banat News ang ilang hepe nga si Insp. Alejandro Batobalonos nakadawat og impormasyon kabahin sa masiao runner nga gikan nga nangolekta sa mga tally sheets niadtong higayuna.

Kini daling gisusi sa kapulisan ug didto nasikop nila sa akto ang gitumbok nga masiao runner nga si Rogelio Lobetos Albores, 46, molupyo sa barangay Alambihod.

Samtang paingon na nilang gidala ang dinakpan sa buhatan niini sila si Abenir ug Toquiro samtang nagsakay sa ilang motorsiklo aksidente kining nalamba pag-abot sa dulhogong bahin sa barangay Sumagwan.

Maayung pagkalamba sa duha ka polis sa semento nga karsada og miresulta sa pagkaangol sa ilang bukton, tuhod ug kalawasan ug gidala sa Isidro Kintanar Memorial Hospital. (BANATNEWS)