Obenza di na motagad sa media
CEBU, Philippines - Si Lapulapu City Mayor Paz Radaza mopataliwa sa problema sa mga sakop sa Association of Reporters in Mandaue and Lapulapu In Truth And Excellence (ARMALITE) ug ni Lapulapu City Police Office Director SSupt. Anthony Obenza.
Atol sa press conference kagahapon sa buntag uban ni Mayor Radaza si ARMALITE President Norman Mendoza sa DYSS/RGMA7 mipadayag sa iyang kasagmuyo batok kang SSupt. Obenza ug sa ubang mga opisyal sa kapolisan sa maong dakbayan.
Matud pa ni Mendoza ipasa-pasa lang sa maong mga polis ngadto sa ilang mga kauban kinsa dili usab manubag sa mga pangutana sa media kalabot sa mga isyu nga bahin sa operasyon sa kapolisan.
Sa laktod miboykoteho na ang kapolisan sa maong dakbayan gikan sa taga-media.
Gumikan niini nabalaka ang mga sakop sa ARMALITE nga adunay mga impormasyon nga gitago ang kapolisan sa Lapulapu Police Office nga dili nila gustong masayran sa taga media aron ikalilong kini ngadto sa publiko.
Gumikan niini si Mayor Radaza mipadayag sa iyang pagpataliwa apan misaad siyang makig-estorya kang Obenza kalabot niini. - BANAT NEWS
- Latest
- Trending
