CEBU, Philippines - Nagpatabang na ang pamilya sa Cebuana nga Overseas Filipino Worker(OFW) sa nasud sa Kuwait kinsa giingong namatay human mahagbong sa ikawalong andana sa gitrabahoang hotel sa maong nasud.
Si Rochel Montesoso nakahilak sa iyang pagpangayo og tabang kang Gob. Gwendolyn Garcia aron madala ang patay’ng lawas sa iyang igsuong si Jovy Montesoso kinsa namatay niadtong Agusto 5 sa maong nasud.
Sumala pa nga naproblema ang banay’ng Montesoso tungod kay wala pa itugot sa gobiyerno sa Kuwait nga madala dinhi sa nasud ang patay’ng lawas niini tungod kay aduna pay himuong imbestigasyon.
Gawas pa niini giingong mokabat og P200 mil ang gikinahanglan aron madala ang lawas niini dinhi sa Pilipinas.
Apan base sa mga pasiunang report, giingong nahulog o naghikog ang biktima pinaagi sa paglayat sa ibabaw nga bahin sa edipisyong iyang gitrabahoan.
Sumala pa sa report sa TV Patrol Central Visayas si Montesoso adunay langyaw nga uyab didto sa maong nasud apan sukad sa pagkamatay ni Montesoso wala na nila kini makontak pa.
Si Garcia mipasalig nga motabang ang lalawigan ngadto sa pamilyang Montesoso kung unsay dili mahatag sa Overseas Workers Welfare Administration aron madala dinhi sa Sugbu ang patay’ng lawas niini.
Buot usab nga hangyuon sa gobernador ang gobiyerno sa paghimo og lakang aron adunay klarong imbestigasyon sa kamatayon ni Montesoso.
Si Montesoso usa palang ka semana gikan nakabalik sa Kuwait gikan nagbakasyon og usa ka bulan dinhi sa Sugbu dihang kini namatay maong nagduda ang pamilya sa pasangil nga naghikog kini sanglit malipayon kini kaayo uban sa nag-inusarang anak nga 6-anyos. (BANAT NEWS)