Mga kahoy gi-monitor

CEBU, Philippines - Ang kagamhanan sa dakbayan sa Talisay miluwat og kamandoan sa pag-monitor sa   mga dagkong punoan sa kahoy ug mga buli ilabi na kadtong nahimutang sa daplin sa kadalanan ug duol sa kabalayan sa maong dakbayan.

Si Talisay City Administrator Richel Bacaltos nga nahinabi sa Banat News kagahapon nagkanayon nga dili sila gusto nga mahitabo sa Talisay   ang nahitabo sa dakbayan sa Sugbo dili pa dugay dihang may drayber nga namatay human madat-ogi sa natumbang acasia.

Ang mga opisyal sa barangay gimandoan nga mo-report dayon ngadto sa city hall kung aduna silay mabantayan nga mga punoan sa kahoy nga maghatag og peligro sa kinabuhi ug kabtangan sa katawhan.

Kagahapon sa hapon si Bacaltos nakigtagbo sa mga kawani sa City Engineering Office ug   sa City Planning and Development Coordinator (CPDC).

Matud ni Bacaltos nga gituki sa ilang tigom   ang bahin sa pag-monitor sa mga dagkung punoan sa kahoy ug buli aron malikayan ang disgrasya.

Ang   report   bahin sa mamatikdang kahoy ug buli nga maghatag og peligro sa   usa ka   lugar    mahimong idirekta   kini ngadto sa buhatan sa city engineering aron kahatagan dayon og aksyon.

Gawas niini gi-monitor usab sa siyudad ang mga kabukirang barangay ug ang daplin sa kabaybayonan ug kasapaan.

Kahinumdoman nga ang Talisay nahilista nga usa sa mga lugar nga haguka kaayo og yuta nga dali ra kaayong modahili sa panahon sa ting-uwan base sa pagpaniid sa mga tinugyanan sa Department of Environment and Natural Resources (DENR).

Ang mga residente sa bukirang barangay, daplin sa kabaybayonan ug kasapaan kanunay’ng gipahimangnoan sa kagamhanan sa siyudad nga magmabinantayon.

Samtang kauban sa mga opisyal nga kagamhanan ang kapolisan sa Talisay sa paganiid sa palibot niining panahon sa ting-uwan.

Si Chief Inspector Eddie Recamara, officer-in-charge sa Talisay City Police Station nagkanayon nga sila maoy   mopahigayon dayon og rescue operation sa panahon   nga adunay mahitabo gumikan sa uwan sa palibot sa Talisay. (BANAT NEWS)