Polis nga nakapusil og bata gikiha

CEBU, Philippines - Mag-atubang og kasong reckless imprudence resulting to physical injury ang usa ka polis nga nakapusil sa 13 anyos nga bayong-bayong didto sa Zone Tangkong, barangay Paknaan, dakbayan sa Mandaue   sa miaging adlaw.

Kini ang nasayran sa Banat News gikan kang Chief Insp. Rex Lomente, hepe sa Investigation Detection and Management Bureau (IDMB) sa kapolisan sa Mandaue City Police Office (MCP0) sa follow up nga gihimo kagahapon.

Si Chief Insp. Lomente miingon nga si P01 Carlito Donque nga nadestino sa Aviation Security Group sa Mactan Cebu International Airport (MCIA) ilang pasakaan sa maong kaso bisan kun ang mga ginikanan sa biktima   nagdumili.

Matud pa ni Chief Insp Lomente nga aksidente nga miboto ang armas ni P01 Donque dihang kalit kining giilog ni Baldino dela Cruz, 39, nga gikaaway   sa polis niadtong higayona.

Gumikan sa kakalit, nakablit ang gatilyo ug sa pagboto niini natapsingan sa saag nga bala ang bitiis sa biktima.

Samtang si Dela Cruz mag-atubang usab og kaso nga direct assault nga ipasaka ni P01 Donque tungod sa pagsumbag ini kaniya ug sa pagsulay unta og ilog sa iyang armas. Dugang pa ni Chief Inspector Lomente nga nasaksihan ang maong karambola ni Lito Tunacao, 45, ang amahan sa biktima kinsa miingon nga aksidente gayud ang nahitabo.

Si Chief Insp. Lomente miingon nga nagsugod   ang away ni Donque ug dela Cruz dihang  ang iring   sa naulahi gipasiritan kuno og tubig sa polis.

Dihang mihiwasa si dela Cruz gihimakak ni Donque ang maong pasangil apan dihang mitalikod ang polis giingong gipikhan kini ni dela Cruz sa iyang kumo.

Sa kapungot nga gibati ni Donque gilanit niini ang iyang armas, apan abtik kaayong gisuwayan og lunggob ni dela Cruz ug dihang naglinayogay sila kalit nga miboto ang armas nga maoy nakaangol sa biktima. (BANAT NEWS)