CEBU, Philippines - Sa labing unang higayon, ang simbahan ug ang provincial government nag-alayon alang sa pagpreserbar sa karaang mga simbahan sa tibuok lalawigan sa Sugbo.
Si Director Carlito Puno sa Cathedral Museum ug chairman usab sa Cebu Archdiocesan Commission for the Cultural Heritage of the Church miduaw sa buhatan ni Governor Gwendolyn Garcia kagahapon ug mitunol sa Memorandum of Agreement (MOA) tali sa simbahan ug sa provincial government.
Nasayran nga ang MOA naghisgut bahin sa pagpanginlabot na unya sa kagamhanan sa lalawigan sa pagpreserbar sa mga simbahan sa nagkadaiyang dapit sa Sugbo nga pinirmahan ni Cebu Archbishop Jose Palma ug governor Garcia.
Matud pa ni Puno nga adunay 52 ka mga heritage churches o karaang simbahan nga angay i-preserbar nga kasagaran niini natukod pa sa panahon sa mga Katsila ug Amerikano nga gitawag nga Colonial Churches.
Apan ila pa usab kining sutaon kun mao lang ba kini ang mga simbahan ang angayang ilakip sa heritage churches.
Samtang si Garcia sa iyang bahin mibutyag nga dako ang iyang kalipay nga labing milig-on karon ang panag-uban sa simbahan ug sa gobyerno sa lalawigan.
Pipila ning maong mga simbahan nga gipreserbar mao ang simbahan sa Dumanjug (San Francisco De Asisi Parish) nga natukod niadtong Marso 28, 1854 diin ang kampanario niini gibalikosan karon sa dagkong gamot sa kahoy nga dakit nga mitubo sa maong lugar. (BANAT NEWS)