Albay gihataga'g P5M ni Gwen

CEBU, Philippines - Mikantidad og P5 milyones ang gitunol ni Governor Gwendolyn Garcia niadtong Sabado   ngadto kang Gobernador Joey Salceda sa lalawigan sa Albay isip hinabang ngadto sa maong probinsya nga naigo sa bagyong Juaning dili pa dugay.

 Si Salceda nga mitambong sa Pasigarbo sa Sugbo Festival niadtong Sabado mapasalamaton kaayo tungod kay may ikatunol na usab siyang hinabang ngadto sa mga pamilya sa iyang lalawighan kinsa nawad-an og mga panimalay ug uban pang kabtangan gumikan sa baha ug landslide nga dala   sa bagyong Juaning nga miigo sa ilang lalawigan sa miaging buwan.

Atol sa paghatag sa nahisgotang hinabang gipirmahan usab ni Garcia ang usa ka Memoramdum of Understanding ( MOU) tali ni Salceda sa probinsiya sa Albay alang sa kasabotan sa hiniusang pagtinabangay sa Sugbo ug sa Albay sa natad sa ekonomiya; edukasyon ug teknolohiya.

Si Salceda nga usa ka ekonomista mitataw nga kung ang Cebu usa pa ka nasud mamahimo ra kaayo kining makapalambo sa kaugalingong ekonomiya bisan pa og gamay ra ang iyang land area.

Nagumikan sa maayong sistema nga gisagop ni gobernador Garcia  nga maoy hinungdan sa kusog nga pag-uswag sa lalawigan   sa tanang aspeto sa pamatigayon niini . - (BANAT NEWS)