Driver gipatiran wingig

CEBU, Philippines - Usa ka drayber sa taxi kinsa misuway og lugos sa iyang pasahero nga estudyante   nawingig human maigo sa patid sa 17-anyos nga dalagita   didto sa barangay Subangdaku, dakbayan sa Mandaue sa miaging hapon.

Si SPO1 Dindo Montesclaros sa Subangdaku Police Station mibutyag sa Banat News nga ang nahisgutang estudyante nga nagtungha sa usa sa mga unibersidad sa dakbayan sa Sugbo misakay sa taxi kansang ngalan wala niya masag-o gikan sa sitio Panagdait, barangay Kasambagan, dakbayan sa Sugbo kay magpahatod unta ngadto sa dalan Mango Avenue sa maong dakbayan.

Sumala ni SPO1 Montesclaros nga ang biktima giingnan   kuno sa drayber , (kansang ngalan wala usab masayri) nga adto sila moagi sa Subangdaku tungod kay huot kaayo ang mga sakyanan sa dapit sa Ayala Center kay may nagbangga nga mga sakyanan   sa maong lugar.

Ang dalagita wala nalang usab moreklamo apan tungod kay namatngonan niining wala paandara sa drayber sa aircon sa taxi , mireklamo kini gumikan sa kainit sulod sa sakyanan.

Unya gipaandar kuno sa drayber ang aircon sa sakyanan ug giuyog usab niini ang lata sa iyang car freshener aron mohumot ang sulod sa sakyanan.

Pipila ka minutos ang milabay nakatagpilaw ang dalagita sulod sa taxi ug mao na lay namatngunan sa biktima nga may misuway og abli sa iyang bakus.

Unya namat-an niya ang dagway sa drayber nga murag nagpanilap samtang gipahunong   ang taxi niini sa daplin sa karsada sa usa ka mingaw nga lugar sa Subangdaku .

Tungod kay maayong pagpanukad niya way tihik-tihik nga gipatiran ang dagway sa mambad nga drayber hinungdan nga nawingig kini ug didto nakahigayon siya sa paggawas sa taxi ug mikabad siyag dagan pahilayo sa maong lugar.

Matud ni Montesclaros nga nalingian sa dalagita nga nagpanghikap sa iyang nawong ang drayber nga posibleng nasakitan sa kakusog sa pagkaigo sa patid.

Ang dalagita mipauli sa ilang balay ug mibalik kini uban sa iyang inahan ug nagpa-blotter sa hitabo apan gumikan sa kakalit sa hitabo, wala niya makuha ang ngalan sa taxi ug ang plate number niini.

Busa subli na usab nga giawhag sa kapolisan ang publiko nga matag sakay og taxi isuwat gyud ang body number niini kun mapakyas man sa pagkuha sa plate number ug ngalan niini aron nga sayon rang masusi sa mga otoridad ang maong sakyanan ug masayran usab ang ngalan sa drayber niini.   (WC)    - (BANAT NEWS)